A Festa do Requeixo e Mel está declarada Festa de Galicia de interese turístico desde 2013. Cada Venres Santo, o requeixo e o mel protagonizan nas Neves unha cita gastronómica que deu os seus primeiros pasos en 1991. Visitantes procedentes de toda Galicia achéganse a esta localidade atraídos polo requeixo, que se degusta acompañado polo mellor mel da cooperativa ou polos viños tintos do Condado. Alén destes produtos representativos da zona, na feira non faltan outros pratos como o polbo á feira, os chourizos ao viño e, por suposto, a música.
Ademais, celébranse cursos, conferencias e seminarios que xiran arredor do requeixo e o mel. Na elaboración do requeixo só se emprega leite de vaca producido en Galicia e fermentos lácticos, sen ningún tipo de conservantes nin estabilizante. Aínda que o seu uso tradicional fose como sobremesa, o requeixo das Neves ten múltiples usos en pratos salgados.
Aínda que é moi difícil sinalar unha data aproximada para a existencia do requeixo das Neves, sabemos que os peregrinos que facían o denominado Camiño da Raíña eran agasallados con requeixo ao seu paso pola zona cara a Compostela.
Pola súa parte, o mel é tamén un dos produtos tradicionais da zona do Condado e A Paradanta. Conta cunhas espléndidas condicións para a súa produción dada a gran cantidade, calidade e variedade de plantas melíferas existentes. Breixo, eucalipto, castiñeiro ou silva son algunhas das especies vexetais nas que as abellas recollen o néctar co que elaboran este mel.
Lugar: Praza Maior das Neves.
